Septyembre 2, 2014

Usa ka Pagbasa Gikan sa Unang Sulat ni San Pablo nga mga Taga-Corinto 2: 10-16

2:10	Apan ang Dios nagpadayag niining mga butanga kanato pinaagi sa iyang Espiritu. Kay ang Espiritu nagasusi sa tanang mga butang, bisan ang kahiladman sa Dios.
2:11	Ug kinsay makahibalo sa mga butang nga iya sa tawo?, gawas sa espiritu nga anaa sa sulod nianang tawhana? Mao usab, walay nakahibalo sa mga butang nga iya sa Dios, gawas sa Espiritu sa Dios.
2:12	Apan wala kita makadawat sa espiritu niining kalibotana, kondili ang Espiritu nga iya sa Dios, aron atong masabtan ang mga butang nga gihatag kanato sa Dios.
2:13	Ug kami usab naghisgot niining mga butanga, dili sa nakat-onan nga mga pulong sa tawhanong kaalam, apan diha sa doktrina sa Espiritu, paghiusa sa espirituhanong mga butang uban sa espirituhanong mga butang.
2:14	Apan ang mananap nga kinaiya sa tawo wala makasabut niining mga butanga nga iya sa Espiritu sa Dios. Kay kini usa ka binuang alang kaniya, ug siya dili makasabut niini, tungod kay kini kinahanglan nga susihon sa espirituhanon nga paagi.
2:15	Apan ang espirituhanong kinaiya sa tawo naghukom sa tanang butang, ug siya sa iyang kaugalingon dili pagahukman ni bisan kinsa.
2:16	Kay kinsa ang nakaila sa hunahuna sa Ginoo, aron siya makatudlo kaniya? Apan aduna kitay hunahuna ni Kristo.

Ang Balaang Ebanghelyo Sumala kang Lucas 4: 31-32

4:31	Ug milugsong siya sa Capernaum, usa ka siyudad sa Galilea. Ug didto iyang gitudloan sila sa mga adlaw nga igpapahulay.
4:32	Ug sila nahibulong sa iyang pagtolon-an, kay ang iyang pulong gisulti uban ang pagbulot-an.
4:33	Ug sa sinagoga, dihay usa ka tawo nga gisudlan ug hugaw nga demonyo, ug siya misinggit sa makusog nga tingog,
4:34	nag-ingon: “Pasagdi ta. Unsa mi para nimo, Jesus nga taga-Nazaret? Mianhi ka ba aron sa paglaglag kanamo? Kaila ko kung kinsa ka: ang Balaang Usa sa Diyos.”
4:35	Ug gibadlong siya ni Jesus, nag-ingon, “Hilum ug pahawa kaniya.” Ug sa gitambog siya sa yawa ngadto sa ilang taliwala, siya mibiya kaniya, ug wala na niya siya buhata.
4:36	Ug nangahadlok silang tanan. Ug sila naghisgot niini sa ilang kaugalingon, nag-ingon: “Unsa kining pulonga? Kay uban ang pagbulot-an ug gahum nagasugo siya sa mga mahugaw nga espiritu, ug sila mibiya.”
4:37	Ug ang iyang kabantug mikaylap sa tanang dapit sa rehiyon.